शिव-भजन
न जान्दछु म को हुँ; न ज्ञान किन जन्म भो’
तिम्रै शरणमा यो भक्त, शिर झुकाउँछ शम्भो
विश्व-ब्रम्हाण्ड नायक, हे सृष्टिका अधिपति
गाएर कैलै’ नसकिने, महिमा छ जसको अति
प्रभु-चरणमा अर्पित, प्रभुकै जीवन यो
तिम्रै शरणमा यो भक्त, शिर झुकाउँछ शम्भो
क्षणभगुँर छ सँसार तर, अनित्यताको स्वाँग गरी
विचित्र जाल मायाको, फसाउँछ घरी-घरी
प्रभुकृपाबिना मुक्ति पाउन, मुश्किल झन् भो’
तिम्रै शरणमा यो भक्त, शिर झुकाउँछ शम्भो
चारैदिनको चोला नश्वर, हुन्छ खरानी जानी-जानी
काम-क्रोध-लोभ-मोहमा फस्छ, अल्पज्ञानी मन अभिमानी
शक्ति मिलोस् सत्मार्गमा, अविचलित होस् कदम यो
तिम्रै शरणमा यो भक्त, शिर झुकाउँछ शम्भो
विकार विचारका नाश होऊन्, चित्त रहोस् ईश-चिन्तन
लोककल्याणमा कर लागुन्, वचन बनोस् प्रभु-कीर्तन
यति अनुग्रह मिले ईश्वर, मानव-जुनी उत्तम भो’
तिम्रै शरणमा यो भक्त, शिर झुकाउँछ शम्भो
तिम्रै शरणमा यो भक्त, शिर झुकाउँछ शम्भो …
************************************************
- प्रविण टण्डन “वसन्तप्रवीण”
सुझाव/प्रतिक्रियाका लागि: basantaprabin@gmail.com
