भानुका नाममा~कविता
भानुका नाममा केही शब्द
आमाले सीताको कथा सुनाउनु भो
बाबाले रामको कथा सुनाउनु भो
कथाको क्रम रोकिएन
मैले लवकुशको कथा
सुनाएँ छोराछोरीलाई ।
अचेल
राम, सीता र लवकुशहरु
फरक भएका छन्
अचेल
रावण, विभीषण र कुम्भकर्णहरु
भिन्न भएका छन् ।
कोही शहर पसेका छन्
कोही राजधानी पसेका छन्
कोही खाडी पसेका छन्
कसैले समुद्र नाघेका छन् ।
तर
रामायणको नयाँ अर्थ
उस्तै छ
रामायणको नौलो भाव
उही छ ।
भानुभक्तले जति जीवन बुझे
सपना, आदर्श र व्यवहार जाने
रामायणभन्दा पर
अचेल जीवन युद्धमय छ
रामायणभन्दा परतिर
अचेल जीवन झन् समरमय छ
भानु !
अब तिमीले अर्कै रामायण लेखिदेउ
अब तिमीले हामीले भोगेको जीवन कथा लेखिदेउ ।
