हिमपातकाबीच कांग्रेसको जिल्ला अधिवेशन हुँदै

जुम्ला,  यहाँ हिमपात भएपनि नेपाली काँग्रेस जुम्लाको छैठौँ जिल्ला अधिवेशन सुरु हुनेभएको छ ।

केन्द्रीय सदस्य दिनवन्धु श्रेष्ठसहितको नेतृत्व तहमा बसेको बैठकले छैठौँ जिल्ला अधिवेशनलाई सौहार्द, शान्त र मर्यादित बनाउने निर्णय गरेको छ । आज बिहानबाट हिमपात भएकाले अधिवेशन केही हदसम्म प्रभावित भएको छ ।

अधिवेशन हलमा भए पनि सञ्चालन गर्ने कि स्थगित गर्ने भन्ने विषयमा निक्र्योल भइनसकेको कार्यबाहक सभापति दीपबहादुर अनुसार हिमपात भए पनि अधिवेशन अगाडि बढाइने छ ।

छैठौँ जिल्ला अधिवेशनमा चन्दननाथ नगरपालिकाबाट ७० र अन्य २६ वटा गाविस गरेर २४१ जना मतदाता सङ्ख्या रहेको कार्यबाहक सचिव कर्णबहादुर शाहीले बताए।

यसअघि धेरैले सभापतिमा दाबी गरे पनि अहिले तीनजना आकाङ्क्षी रहेको सचिव शाहीको भनाइ छ । उनले लोकतान्त्रिक परिपाटीबाट चल्ने पार्टीले लोकका बीचमा उम्मेदवार छोड्ने सिद्धान्त हुँदाहुँदै पनि प्रतिस्पर्धाको अभ्यास पनि अगाडि बढेको बताए।