काठमाडौँ, प्रमुख प्रतिपक्ष दल नेपाली काङ्ग्रेसले भूकम्प र नाकाबन्दीबाट पीडित जनताको पक्षमा सरकारले काम नसकेको आरोप लगाउँदै सांसदको भूमिकाबारे बृहत् छलफलको खाँचो औँल्याएको छ ।
व्यवस्थापिका–संसद्को आजको बैठकमा काँग्रेसका नवीन्द्रराज जोशीले ३१ मन्त्रालय, छ उपप्रधानमन्त्रीसहितको सरकार गठन भए पनि चिसोमा कठ्याङ्ग्रिएका जनताले सरकारको महसुस गर्न पाएका छैनन् भने।
उनले भने – “महँगीको मारमा जनता छट्पटाइरहेका भए पनि सरकार मन्त्रालय, मन्त्री थप्नेतिर उद्दत भएको छ, नाकाबन्दी र भूकम्पबाट पीडितलाई राहत दिने मामिलामा संवेदनशील छैन, त्यसैले सांसदको भूमिकाबारे बृहत् छलफलको आवश्यकता देखिएको छ ।”
एकीकृत नेकपा माओवादीका श्यामकुमार श्रेष्ठले चिसोका कारण दोलखामा १३ भूकम्पपीडितको मृत्यु भएको बारेमा सदनको ध्यानाकर्षण गराउँदै पीडितलाई सरकारले राहत पु¥याउन नसकेकामा गुनासो गरे । उनले आन्दोलनरत मधेसी समुदायको माग सम्बोधन गर्न तीन दलको निर्णयले छिट्टै पूर्णता पाओस् भने ।
मधेसी जनअधिकार फोरम नेपाल लोकतान्त्रिकका आशा चतुर्वेदीले पानी, बिजुली, तेल र पानी नभएको नयाँ नेपालको कस्तो परिकल्पना गरिएको हो भनी प्रश्न गरे।
उनले तराई मधेसमा हुँदै आएको आन्दोलन र अघोषित नाकाबन्दीलाई खुलाउनेतर्फ सरकारको ध्यानाकर्षण गराए ।
नेपाल मज्दुर किसान पार्टीका डिल्लीराज काफ्लेले भारतीय नाकाबन्दीका कारण खाना पकाउने ग्यास र पेट्रोलियम पदार्थको अभाव भएको बताउँदै सरकारले विभिन्न जलविद्युत् आयोजना निर्माणका लागि भारतीय कम्पनीलाई सुम्पेको आरोप लगाए ।
नेकपा संयुक्तका जयदेव जोशीले सरकारले जनता र मुलुकप्रति जनाएको प्रतिबद्धता पूरा नगरेको, कालोबजारी बढेको, इन्धनको अभावमा दाउरासमेत दिन नसकेको तथा भूकम्पपीडितलाई नौ महिनासम्म राहत पु¥याउन नसकेको बताए ।
नेपाल परिवार दलका मिलन राजवंशीले भूकम्प र नाकाबन्दीबाट अभाव र कठिनाइ भोगिरहेको जनताको समस्या सुल्झाउने र जवाफदेहिता प्रस्तुत गर्ने काम सरकारबाट भएको छैन भने।
नेकपा एमालेका रञ्जनाकुमारी सरकारले सर्लाही जिल्लाको हरिपुर गाविसमा आज रामनरेश रायको हत्या भएकाले त्यसको छानबिन गरी दोषीलाई कारबाहीको माग गरे।
––––––––
