उपेन्द्र यादव र गच्छदार मिल्दै !

 

काठमाडौं, १३ वैशाख– स्थानीय तहको निर्वाचन नजिकै गर्दा मधेसकेन्द्रित दलबीच एकता गर्ने होडबाजी चलेको छ । केही दिन अघि छ मधेशवादी दल मिलेर राष्ट्रिय जनता पार्टी बनेपछि मधेशको राजनीति गर्ने दलबीच एकता गर्ने र आफू शक्तिशाली बन्ने होड चलेको छ । राष्ट्रिय जनता दल बन्नु अघि उपेन्द्र यादवको पार्टीले नयाँ शक्ति पार्टीसित एकता गर्ने विषय पदका कारण तत्काललाई टरेको थियो । जब छ मधेशवादी दल मिलेर मधेशमा बलियो बनेको सन्देश दिए तब यादव दबाबमा परे । संघीय समाजवादी फोरम अध्यक्ष यादवले आफूले भने अनुसार संविधान संशोधन नभइसकेकाले बाबुराम भट्टराईको नयाँ शक्तिसँग तत्कालै पार्टी एकता गर्ने मुडमा थिएनन् । भट्टराई संविधान बनाउने मध्येका प्रमुख व्यक्ति भएकाले तत्कालै मिल्दा मधेसीमा गलत प्रचार हुने डरका कारण तत्काल पार्टी एकताको पक्षमा थिएनन् । छ मधेशी दलको एकतासँगै मधेशमा बढेको धु्रवीकरणका यादव चेपुवामा परेका छन् ।

 
जब वैशाख ७ मा एकाएक ६ मधेसी दलबीच एकता भयो तब त्यसको भोलिपल्ट यादवलेउच्च नेतृत्वको पार्टी एकता तयारी समिति गठन गरे । जसमा भट्टराई र अशोक राईको नेतृत्वमा एकता तयारी समिति गठन भयो ।
यसैबीच यादवले आफुबाटै फुटेर बनेको फोरम लोकतान्त्रिकका नेता गच्छदारसँग पार्टी एकता गर्ने विषयमा छलफल चलाएका छन् । २५ सिटसहित संसदमा ठूलो बनेको राजपालाई साइजमा राख्नका लागि यादवले गच्छदार नेतृत्वको लोकतान्त्रिक फोरमसँग कार्यगत एकता गर्दै मिल्ने रणनीति लिएका छन् । फोरम लोकतान्त्रिकसँग संसदमा १७ सिट छ । यसका साथै उनले जयप्रकाश गुप्ता नेतृत्वको तराई मधेस राष्ट्रिय अभियानलाई समेत आफ्नो पक्षमा जोड्न लागेका छन् ।

 
यस विषयमा यादवले गच्छदारसँग छलफल चलाइसकेका छन् । राजपा बनेलगत्तै यादव र गच्छदारबीच फोन संवाद भएको थियो । यसैबीच नयाँ शक्ति र संघीय समाजवादी फोरमले एउटै चुनाव चिन्हमा स्थानीय तहको चुनावमा भाग लिने निर्णय गरेका छन् । यसको जानकारी दुवै दलले निर्वाचन आयोगमा गरिसकेका छन् । फोरमको नाममा दर्ता रहेको एक हातले मशाल समातेको चुनाव चिन्हमा निर्वाचनमा सहभागी हुने निर्वाचन आयोगमादुवै दल मञ्जुर रहेको निवेदन दिएका छन्।

सम्बन्धित शिर्षकहरु