फागुन १६ ।काठमाडौ,विश्वकप क्रिकेट प्रतियोगिता अन्तरगत शनिबार बिहान भएको खेलमा न्यूजिल्यान्डले अस्ट्रेलियालाई हराउदै जीत हासिल गरेको छ । आयोजक राष्ट्र न्यूजिल्यान्डले अर्को आयोजक अस्ट्रेलियामाथि गरेको जित रोमाञ्चक थियो । अस्ट्रेलियाले ३२.२ ओभरमा अलआउट हुँदै दिएको १५२ रनको लक्ष्य न्यूजिल्यान्डले ९ विकेटको क्षतिमा २३.१ ओभर खेल्दै भेट्टाएको हो ।
यो पटकको विश्वकपका दाबेदार मानिएका यी दुई टिमबीचको भिडन्त न्यूजिल्यान्डको अक्ल्यान्डमा भएको थियो । यी दुईको भिडन्तले दुबै देशका दर्शकलाई अन्तिम समयसमम्म शास रोक्न बाध्य बनायो ।
अन्ततः खुसीका हकदार भने न्यूजिल्यान्डका समर्थक भए । वान डे क्रिकेटमा एक नम्बर टिम न्यूजिल्यान्ड कुनै बेला ५ विकेट गुमाएर १३१ रन बनाई खेलिरहेको थियो ।
न्यूजिल्यान्डले जारी विश्वकपमा लगातार चार खेलमा जित निकालेको हो । अस्ट्रेलियालाई हराउन ओपनर ब्रेन्डन म्याकुलमले सर्वाधिक ५० रन जोडे । उनले २४ बलको सामना गर्दै ७ चौका र ३ छक्काको मद्धतमा किबी टिमको जितको आधार खडा गरेका थिए ।
त्यसैगरी नटआउट रहँदै विजयी छक्का हानेका केन विलियम्सनले ४५ रनको पारी खेले । उनले ४२ बलको सामना गर्दै ४ चौका र १ छक्काको मद्धतमा सो स्कोर खडा गरे । त्यसैगरी कोरी एन्डरसनले २६ रन जोडे ।
उसले त्यसपछि थप चार विकेट १५ रन जोड्ने क्रममा गुमायो । १४६ रन बनाएको अवस्थामा न्यूजिल्यान्डले ९ विकेट गुमाइसकेको थियो । किबी टिमलाई जितका लागि ६ रनको आवश्यकता रहेको अवस्थामा उसको हातमा एक विकेटमात्र बाँकी थियो ।
त्यो अवस्थामा अस्ट्रेलियाका प्याट कमिन्स २४ औं ओभर बलिङ गर्न आए । २४ औं ओभरको पहिलो बलमै केन विलियम्सनले छक्का हानेर न्यूजिल्यान्डलाई जिताए ।
यसअघि न्यूजिल्यान्डसामू अस्ट्रेलियाको पूरै टिमले घुँडा टेकेको थियो । अस्ट्रेलियाको पूरा टिम ३२.२ ओभरमा १५१ रन बनाउँदै अलआउट भयो । अस्ट्रेलियन टिमले शुरुवात पनि खराब गरेको थियो । उसको पहिलो विकेट ३० रन बनाउँदा गिरेको थियो ।
अस्ट्रेलियाका लागि ब्राड हडिनले चार चौका र दुई छक्का प्रहार गर्दै ४३ रन बनाए भने ३० बलमा दुई चौका प्रहार गर्दै ३४ रनको योगदान गरे। यस्तै शेन वास्टनले २३ रन, अरोन फिन्चले १४ र मिचेल क्लेर्कले १३ रन जोडे।
न्यूजिल्यान्डका लागि ट्रेन्ट बोल्ट एक्लैले अस्ट्रेलियाका ५ खेलाडीलाई पेभेलियनको बाटो देखाए । टिम साउथी र डानियल भेटोरीले समान २र २ विकेट लिए। यस्तै कोरी एन्डर्सनले एक विकेट लिए।
