माघ २, काठमाण्डौ– “माघ ८ मै नयाँ संविधान : नागरिक अभियान”ले शुक्रबार नयाँ बानेश्वरमा सभासदसंग सर्वसाधारणको सडक वहस र नमुना मतदान सम्पन्न गरेको छ । सडक बहसमा जनताको प्रश्नको उत्तर दिन नेपाली काँग्रेसका युवा सभासद चन्द्र भण्डारी र नेकपा एमालेकी सभासद मधु गुरुङ उपस्थित थिए ।
कार्यक्रममा बोल्दै नेपाली काग्रेसका सभासद भण्डारीले ४१३ युवा सभासदले माघ ८ मै संविधान आउनु पर्ने भन्दै सभामुखलाई हस्ताक्षर बुझाएको बताउदै माघ ८ मै पुर्ण संबिधान आउन नसके पनि संविधानको मस्यौदा आउनेमा ढुक्क हुन जनतालाई आग्रह गर्नु भयो । त्यस्तै नेकपा एमालेकी सभासद मधु गुरुङ्कले संविधान ल्याउने कुरामा कुनै सभासदको दुईमत नरहेको प्रस्ट पार्नु भयो । उहाँले माघ ८ मै प्रक्रियामा गएर भए पनि संविधानको खाका जारी गर्न सभासदहरुले नै दबाब अभियान सञ्चालन गरेको उल्लेख गर्नु भयो ।
महिला अधिकारकर्मी डा. रेणु राज भण्डारीले माघ ८ मै संविधान ल्याउन आलटाल गरे अहिलेका राजनितिक नेता अक्षम साबित हुने भन्दै आफैले तोकेको मितीमा संबिधान जारी गर्न नसके सबैले सभासद भइरहने नैतिक हैसियत गुमाउने बताउनु भयो । महिला अधिकारकर्मी सुनिता दनुवारले बेचविखनमा परेका महिला तथा बालबालिकाको अधिकार सुनिश्चित भएको संविधान ल्याउनुपर्नेमा जोड दिनुभयो । दलित अधिकारकर्मी भक्त विश्वकर्माल नेताहरुलाई माघ ८ मै संविधान ल्याउन जनतासामु आफ्ना्े बाचा पुरा गर्नुपर्नेमा जोड दिनुभयो । कार्यक्रममा बोल्दै महिला मानबअधिकार रक्षकहरुको राष्ट्रिय सञ्जालकी बिष्णुकला भण्डारीले हिंशामुक्त समाजका लागि महिलामैत्रि संविधान तोकिएकै मितिमा जारी हुनुपर्नेमा जोड दिनुभयो ।
सडक बहस चलिरहदाँ नमुना मतदान समेत गरिएको थियो । तन्नेरी युवाहरुले गराएको मतदानमा २ वटा मतपेटिका राखिएको थियो जसमध्य एकमा “माघ ८ मा संविधान नदिए पनि तपाँईनै मेरो नेता” र अर्कोमा “माघ ८ मा संविधान नदिए तपाई सबै मेरा लागि असक्षम” लखिएको थियो । कार्यक्रमको अन्त्यमा सभासदद्दयको अगाडि मतपरिणाम घोषणा गरिएका थियो । मतपरिणाम घोषणा गर्दै अभियन्ता रमेश अधिकारीले जम्मा २०४ मत खसेकोमा २०२ मत “माघ ८ मा संविधान नदिए तपाई सबै मेरा लागि असक्षम” भन्नेमा र २ मत “माघ ८ मा संविधान नदिए पनि तपाँईनै मेरो नेता” भन्ने पक्षमा खसेको जानकारी गराएका थिए ।
शान्तिका लागि साझा अभियान (कोक्याप)ले संयोजन गरिरहेको अभियानको आजको कार्यक्रममा महिला मानबअधिकार रक्षकहरुको राष्ट्रिय सञ्जालका कलाकारले बिविध साँस्कृतिक प्रस्तुती समेत राखेका थिए । अभियानका कार्यक्रम निरन्तर जारी रहने कोक्यापकी अध्यक्ष उषा बरुवालले जानकारी गराउनु भयो ।
फोटोहरु सौजन्य: दीपक शर्मा/ कोक्याप
