डब्बोमा बहुसांस्कृतिक योग, ध्यान तथा मानसिक स्वास्थ्य कार्यक्रम सम्पन्न

डब्बो, अष्ट्रेलिया। डब्बो नेपाली समुदाय अष्ट्रेलिया (DNCA) को आयोजनामा बहुसांस्कृतिक योग, ध्यान तथा मानसिक स्वास्थ्यसम्बन्धी विशेष कार्यक्रम सफलतापूर्वक सम्पन्न भएको छ। कार्यक्रममा विभिन्न समुदायका सहभागीहरूको उत्साहजनक उपस्थिति रहेको थियो।

कार्यक्रममा विश्व शान्ति, मानसिक स्वास्थ्य, योग तथा आत्मचेतना सम्बन्धी विशेष प्रशिक्षण तथा प्रेरणादायी प्रवचन प्रदान गरिएको थियो। कार्यक्रमका प्रमुख प्रशिक्षक प्रो. योगी आचार्य राजन शर्मा रहनुभएको थियो। उहाँ नेपालका पाशुपति, बौद्ध तथा आत्मबोध आश्रमसँग आबद्ध आध्यात्मिक साधक हुनुका साथै द ग्लोबल सोसाइटी फर पिस एन्ड स्पिरिचुअल साइन्स (GSPSS) का संस्थापक पनि हुनुहुन्छ।

उहाँले सहभागीहरूलाई साउण्ड हिलिङ थेरापी, कुण्डलिनी जागरण योग, गहिरो ध्यान, तनाव व्यवस्थापन, आत्म-उपचार विज्ञान तथा जीवन व्यवस्थापन सम्बन्धी प्रशिक्षण प्रदान गर्नुभएको थियो। कार्यक्रममा सहभागी धेरैले यसलाई “अद्भुत र जीवन परिवर्तनकारी अनुभव” का रूपमा व्यक्त गरेका थिए।

कार्यक्रमले नेपाल र नेपालीको आध्यात्मिक ज्ञान, पूर्वीय दर्शन, योग तथा ध्यानको महत्वलाई अष्ट्रेलियाको बहुसांस्कृतिक समाजमा परिचित गराउन महत्वपूर्ण भूमिका खेलेको आयोजकहरूको भनाइ छ। यस प्रकारका कार्यक्रमहरूले मानसिक तनाव, चिन्ता, एक्लोपन तथा जीवनशैलीजन्य समस्याबाट प्रभावित व्यक्तिहरूलाई सकारात्मक दिशा प्रदान गर्ने विश्वास व्यक्त गरिएको छ।

कार्यक्रम सफल बनाउन सहयोग पुर्‍याउनुहुने बिकास दवाडी, सुवा राज मैनाली, Lorna Brennan, Gargi Ganguli, दिनेश ढुंगाना, सरोज श्रेष्ठ लगायत सम्पूर्ण स्वयंसेवक, सहयोगी तथा सहभागीहरूप्रति आयोजकले आभार व्यक्त गरेका छन्।

साथै Western NSW PHN, Buninyong Public School – NSW DoE SACC तथा Dubbo South Public School को सहयोगप्रति पनि विशेष धन्यवाद ज्ञापन गरिएको छ।

डब्बो नेपाली समुदायले आगामी दिनहरूमा पनि योग, ध्यान, मानसिक स्वास्थ्य, बहुसांस्कृतिक सद्भाव तथा सामुदायिक कल्याणसम्बन्धी कार्यक्रमहरूलाई निरन्तरता दिने जनाएको छ।

“शान्त मन, स्वस्थ जीवन र जागृत चेतना नै वास्तविक उपचार हो” भन्ने सन्देशसहित सम्पन्न उक्त कार्यक्रमले सहभागीहरूमा सकारात्मक ऊर्जा, आत्मविश्वास तथा जीवनप्रतिको नयाँ दृष्टिकोण प्रदान गरेको आयोजकहरूको भनाइ रहेको छ।