असोज २४,काठमाडौं । हिजो निर्मल निवासमा आयोजित आफ्नो ७१ औं जन्मोत्सवको जन्मदिन समारोहमा पूर्वराजा ज्ञानेन्द्र शाहले देश विखण्डनतर्फ जान्छ कि भन्ने चिन्ता व्यक्त गर्नुभएको छ । तपाईँ हामीलाइ थाहा भएदेखि पूर्वराजा ज्ञानेन्द्रले अन्तिममा बोल्ने गर्नुभएको एउटा वाक्य ” श्री पशुपतिनाथले हामी सबैको कल्याण गरुन् ” भन्ने वाक्य भने परिवर्तन भएको छ । राजतन्त्र र गद्दी सँगै उहाँको चर्चित वाक्यमा पनि परिवर्तन अाएको हो । आफ्नो जन्मदिनको अवसरमा जारी सन्देशमा उहाँले यो वाक्यलाई परिवर्तन गर्नुभएको हो । समारोहमा उहाँले पत्रकारहरुसँग कुरा गर्दै देशलाई एकताबद्ध बनाएर लैजान नेताहरुलाई सुझाव दिनुभएको छ । शाहको जन्मदिनमा सयौंको संख्यामा सर्वसाधारण, सुभेक्षुक, राप्रपाका नेता कार्यकर्ता तथा पूर्व कर्मचारीहरुको घुँइचो लागेको थियो । साहित्यिक शैलीमा लखिएको सन्देशमा उहाँले कस्तुरी हराएको मृगको उदाहरण दिनुभएको छ । सन्देशमा उहाँले राष्ट्र र राष्ट्रियताको चिन्ता गर्नुभएको छ । अन्त्यमा पशुपतिनाथ नछुटाए पनि हामी “सबैको कल्याण गरुन्” भन्नुको साटो “सबैमा सुबुद्धि र प्रेरणा दिउन्” भन्ने कामना गरिएको छ ।
