मंसिर १७ । गौशाला, भारतबाट अवैध रुपमा चोरी पैठारी गरी नेपाल भित्र्याइएका रु दुई लाखभन्दा बढी मूल्यका कपडा प्रहरीले गएराति बरामद गरेको छ ।
प्रहरी चौकी मटिहानीबाट अपराध नियन्त्रणका लागि गएको गस्ती टोलीले गएराति जिल्लाको धीरापुर गाविस– ९ स्थित बाटोबाट कपडा बरामद गरेको हो ।
भारतबाट बिआर२२जे ४६९८ नंको प्लाटिना मोटरसाइकलमा तस्करी गरी ल्याएको र धीरापुर– ९ स्थित बाटोमा रोकिराखेको अवस्थामा ३९ थान विभिन्न रङका पाइन्टका कपडा गस्ती टोलीले बरामद गरेका प्रहरी नायब उपरीक्षक विनोद सिलवालले बताउनुभयो ।
बरामद गरिएको कपडा, मोटरसाइकलसहित आवश्यक कारबाहीका लागि जिल्ला भन्सार कार्यालय जलेश्वरमा पठाउने तयारी गरिरहेको जिल्ला प्रहरी कार्यालयले जनाएको छ ।
