काठमाडौं । नेपाल आयल निगम लिमिटेडले फेरि पेट्रोलियम पदार्थको मूल्यवृद्धि गरेको छ । दुई साता अघि भाउ बढाएको निगमले इन्डियन आयल कर्पोरेशनले इन्धनको मूल बढाएर पठाएसँगै फेरि बढाएको हो ।
निगमले बिहीबार रातिदेखि लागू हुने गरी पेट्रोल, डिजेल र मट्टितेलमा प्रतिलिटर ५/५रुपैयाँ भाउ बढाएको हो । नयाँ मूल्यअनुसार पेट्रोलको मूल्य १५० रुपैयाँ पुगेको छ भने डिजेल र मट्टितेलको मूल्य १३३ रुपैयाँ कायम गरिएको छ । यो इतिहासकै सर्वाधिक महँगो हो ।
यस्तै निगमले आन्तरिकतर्फको हवाई इन्धनको मूल्य प्रतिलिटर १० रुपैयाँ र अन्तर्राष्ट्रियतर्फ हवाई इन्धनको मूल्य प्रतिकिलोलिटर १०० अमेरिकी डलर वृद्धि गरेको छ । निगमले एलपी ग्यासको मूल्य भने यथावत राखेको छ ।
रुस युक्रेन युद्धका कारण अन्तर्राष्ट्रिय बजारमा कच्चा तेलको मूल्य लगातार बढ्दा बाध्य भएर नेपालमा पनि मूल्य वृद्धि गर्नु परेको निगमले जनाएको छ ।
भाउ बढाउँदा पनि आगामी १५ दिनमा करिब २ अर्ब ५० करोड घाटा हुने निगमको प्रक्षेपण छ ।
