असार ९,काठमाडौं । मुग्लिन–नारायणगढ सडकमा पर्ने कालीखोलामा पहिरोजाँदा प्रहरीको भ्यान पुरिएर दुई जनाको मृत्यु भएको छ भने अरु दुई प्रहरीहरु हराइरहेका छन् । मुग्लिन–नारायणगढ सडकखण्ड गएराति ११ बजेदेखि नै पहिरोले अवरुद्ध भएको थियो । त्यस ठाउँमा ना ५ ख ७८२७ नम्बरको ट्रक पनि पहिरोले पुरिएको थियो । पहिरोले सडक बन्द भएको सूचना पाएपछि इलाका प्रहरी कार्यालय मुग्लिनका प्रहरी असईको नेतृत्वमा पहिरोको अवस्था बुझ्न कालीखोला आएको थियो । ठूलो पहिरो झरेको, ट्रक पुरिएको र बाटो बन्द भएको निरीक्षण गरेर उनीहरू फर्किँदै थिए । फर्कने क्रममा माथिबाट झरेको पहिरोले ना १ झ ९३ नम्बरको भ्यानलाई पुरेको जिल्ला प्रहरी कार्यालय चितवनले जनाएको छ । भ्यानमा इलाका प्रहरी कार्यालय मुग्लिनका प्रहरी सहायक निरीक्षक (असई) निश्चल तामाङ, प्रहरी जवान दीपककुमार मास्के, सन्दीप कार्की र लीलबहादुर चेपाङ सवार थिए । घटनास्थलबाट दुई जनाको शव निकालिए पनि मृतकको सनाखत भएको छैन । चितवन प्रहरीका अनुशार पहिरो पन्छाउने र अन्य दुईजना प्रहरीलाई खोज्ने काम सँगसँगै अघि बढाइएको छ ।
