विपक्षी सात दलले अन्य दलसँग पनि सहमति कायम गर्ने

असार २४ ।काठमाडौँ,एकीकृत नेकपा माओवादी लगायत सात दलको बैठकले संविधान निर्माणमा सहज वातावरण तयार पार्नका लागि कार्यसूची मिल्ने दलबीच सहमति कायम गर्ने निर्णय गरेको छ ।

एमाओवादी अध्यक्ष पुष्पकमल दाहालको निवास लाजिम्पाटमा बसेको सात दलको बैठकमा पहिचानसहितको सङ्घीयता र सङ्घीयतासहितको संविधान निर्माणका लागि अपनाउनुपर्ने विषयमा सात राजनीतिक दल सहमति नजिक पुगेका हुन ।

आजको बैठकमा सङ्घीय प्रणाली, न्यायापालिका, शासकीय स्वरुप र निर्वाचन प्रणालीको विषयमा सहमति नजिक पुगेको सङ्घीय समाजवादी पार्टीका महासचिव राजेन्द्र श्रेष्ठले जानकारी दिनुभयो ।

राज्य पुनःसंरचना गर्दा बढीमा १४ र घटीमा १० प्रदेश पहिचानका आधारमा निर्माण गर्नुपर्ने, न्यायपालिकालाई सङ्घीय न्यायापालिकाको संज्ञा दिनुपर्ने, समावेशी– समानुपातिक प्रतिनिधित्वलाई व्यावहारिक रुपमा नै आत्मसात् गर्नुपर्ने विषयमा समान धारणा बनाइएको हो ।

यस्तै बैठकले कार्यसूची मिल्ने संविधानसभाभित्रका अन्य दल र संविधानसभा बाहिरका अन्य दलसँग पनि मिलेर काम गर्ने निष्कर्ष निकालेको महासचिव श्रेष्ठले जानकारी दिनुभयो ।

‘संयुक्त लोकतान्त्रिक गणतान्त्रिक मोर्चा’ नाम दिइने सो गठबन्धनमा व्यवस्थापिका–संसद्मा रहेका सात प्रतिपक्षी दलको सहभागिता रहने जनाइएको छ । आजको बैठकमा एमाओवादी, मधेसी जनअधिकार फोरम नेपाल, फोरम (लोकतान्त्रिक), , तराई –मधेस लोकतान्त्रिक पार्टी, सङ्घीय समाजवादी पार्टी, सद्भावना पार्टी र तराई -मधेस सद्भावना पार्टीका शीर्ष नेतृत्वको सहभागिता थियो । मोर्चाले यही असार २६ गते पत्रकार सम्मेलन गर अवधारणापत्र सार्वजनिक गर्ने भएको छ ।

 

सम्बन्धित शिर्षकहरु