भक्तपुर, । प्रधानमन्त्री एवम् नेकपा एमालेका अध्यक्ष केपी शर्मा ओलीले नेपाल मजदुर किसान पार्टीका अध्यक्ष नारायणमान बिजुक्छेसँग राष्ट्रपतिको निर्वाचनमा एमाले उपाध्यक्ष विद्यादेवी भण्डारीलाई मतदान गर्न आग्रह गरेका छन्।
प्रधानमन्त्री ओली, नेता माधवकुमार नेपाल, राष्ट्रपतिका उम्मेदवार भण्डारी, पूर्वसभामुख सुवास नेम्वाङ र कानुन, न्याय तथा संसदीय व्यवस्थामन्त्री अग्नि खरेलसहितको टोली आज कमलविनायकस्थित बिजुक्छे निवास पुगेर मतदान गर्न आग्रह गरेको हो ।
नेमकिपाले राष्ट्रपतिका उम्मेदवारमा नारायण महर्जनलाई उम्मेदवार बनाएपछि आजै प्रधानमन्त्रीसहितको एमाले नेताको टोली बिजुक्छे निवास पुगेको थियो । उच्चस्तरीय राजनीतिक संयन्त्रमै रहेको नेमकिपाले राष्ट्रपतिमा उम्मेदवार दिएपछि एमालेको टोली बिजुक्छे निवास पुगेको हो । एमाले र नेमकिपाको टोलीबीच भएको आधा घन्टाको भेटपछि प्रधानमन्त्री ओलीले सञ्चारकर्मीलाई प्रतिक्रिया दिँदै बुधबार हुने राष्ट्रपतिको निर्वाचनमा भण्डारीलाई समर्थन गर्न आग्रह गरिएको बताए ।
भण्डारीप्रति नेमकिपा सकारात्मक
बिजुक्छे निवासबाट बाहिरिँदै राष्ट्रपतिको उम्मेदवारसमेत रहेका भण्डारीले नेमकिपासँगको छलफलमा आफूलाई समर्थन गर्न सो पार्टी सकारात्मक रहेको जनाएको बताए ।
एमाले नेता नेपालले राष्ट्रपतिको उम्मेदवार भण्डारीलाई नै नेमकिपाले समर्थन गर्ने र त्यसका लागि नेमकिपाको आजको बैठकले निर्णय गर्ने अध्यक्ष बिजुक्छेले जानकारी गराएको बताए ।
छलफलपछि नेता बिजुक्छेले उच्चस्तरीय राजनीतिक संयन्त्रको सिद्धान्तअनुसार भण्डारीलाई साझा उम्मेदवार बनेको खण्डमा सघाउन तयार भएको बताएको नेता नेपालको भनाइ छ ।
राष्ट्रपतिको उम्मेदवार बनाउनुअघि संयन्त्रमा छलफल नहुँदा नेमकिपाले पनि उम्मेदवार उठाएको बताउँदै उनले एमालेको राष्ट्रपति मात्रै नभई सबैको साझा राष्ट्रपति भएर पदीय जिम्मेवारी बहन गर्नुपर्ने सर्त राखेको नेता नेपालले बताए।


![;ª3Lo nf]stflGqs u0ftGq g]kfnsf] bf];|f] /fi6«klt kbdf cfkmgf] pDd]bjf/L btf{ kl5 cleefjfbg ug'{x'Fb} g]skf -Pdfn]_sf pkfWoIf ljBfb]jL e08f/L . tl:a/ M /Tg >]i7, /f;; .](http://ausnepalnews.com/wp-content/uploads/2015/10/Rss_Images_1445937760058_RS-KTM-President-darta-2-300x209.jpg)






