प्रधानमन्त्रीको व्यावहार मुलुकको लागि दुर्भाग्य : नेपाली कांग्रेस

काठमाडाैं । प्रमुख प्रतिपक्ष दल नेपाली कांग्रेसले प्रधानमन्त्री के.पी. शर्मा ओलीको पछील्ला अभिव्यक्त्तिले गम्भीर प्रश्न सृजना गरेकाे भन्दै यस बिषयमा सरकार र नेकपाको संस्थागत धारणा सार्वजनिक गर्न माग गरेको छ ।

बुधबार निकालेको आफ्नो प्रेस विज्ञप्ति मार्फत नेपाली कांग्रेसले पछिल्लो समयमा बाहिर आएका प्रधानमन्त्री ओलीको अभिव्यक्त्ति र व्यावहारप्रति विमति जनाउदै उनको शासन गर्ने नैतिक र राजनैतिक आधार समेत गुमेको ठहर गरेको छ ।

आजको परिस्थितिमा प्रधानमन्त्रीको दायित्व एकातर्फ र ब्यवहार अर्कातर्फ हुनु देशका लागि दुर्भाग्य भएको काङ्रेसले बताएको छ ।

प्रतिपक्षी दलका तर्फबाट सार्वजनिक प्रश्न गर्नु कर्तव्य भएकाे उल्लेख गर्दै कांग्रेसले प्रधानमन्त्रीका अभिव्यक्तिहरुले देश र सम्बन्धित दलको प्रतिनिधित्व गर्न नसकेको आरोप लगाएको छ ।

विज्ञप्त्तिमा भनिएको छ,” “नेपाल देश र सम्बन्धित दलको प्रतिनिधित्व गर्दैनन् भने प्रधानमन्त्री पद व्यक्त्तिको जिम्मेवारी कि देशको जिम्मेवारी ?”

नेपाली काङ्रेसले सार्वजनिक गरेको विज्ञप्त्तिको पूर्ण अंश :-

प्रधानमन्त्रीको अभिव्यक्ति नेपाल सरकार र नेकपाको मत होइन भने शासन गर्ने नैतिक र राजनैतिक आधार उहाँले गुमाएको थप पुष्टि हुन्छ ।

पछिल्लो समय देशमा देखिएको विविध परिदृश्यमा प्रधानमन्त्री के.पी. शर्मा ओलिका अभिव्यक्तिहरुले केही गम्भीर प्रश्न सृजना गरेका छन् । प्रतिपक्षी दलका तर्फबाट सार्वजनिक प्रश्न गर्नु हाम्रो कर्तब्य भएको छ— देशको प्रधानमन्त्रीका अभिव्यक्तिहरुले नेपाल देश र सम्बन्धित दलको प्रतिनिधित्व गर्दैनन् भने प्रधानमन्त्री पद व्यक्तिको जिम्मेवारी कि देशको जिम्मेवारी ?

आजको परिस्थितिमा प्रधानमन्त्रीको दायित्व एकातर्फ, ब्यवहार अर्कातर्फ हुनु देशका लागि दुर्भाग्य भएको छ ।

(१) बाढी–पहिरोमा कयौंको मृत्युु भएको बेला देशको प्रधानमन्त्रीको दायित्व के हुन्छ र के हुनुपर्दछ ? केवल समवेदनाको एक वक्तव्य ?
(२) कोरोना महामारीका बेला देशको प्रधानमन्त्रीको दायित्व के हुन्छ कयौंको मृत्यु र हजारौं संक्रमित भएको विवरण बहिखातामा सारेर बस्ने तर समय सदुपयोग गरेर युद्धस्तरमा तयारी नगर्ने ?
(३) सर्वसम्मतिले देशको नयाँ नक्सा संसदबाट जारी भएपछि प्रधानमन्त्रीको दायित्व के हुन्छ ? गम्भीर कुटनैतिक पहलकदमी गर्ने कि नक्सालाई सत्ता राजनीतिको ब्यक्तिगत हतियारका रूपमा उपयोग गर्ने ?
(४) नक्सा अनुरुपको जमिनमा हक स्थापित गर्न गम्भीर कुटनैतिक पहलकदमी भन्दा अयोध्याबारे विवादास्पद मत व्यक्त गर्नुको अर्थ बिषयको गम्भीरताप्रति प्रधानमन्त्री गम्भीर हुनुहुन्न् भन्ने पुष्टि त भएको छ नै अपरिपक्व टिप्पणी मार्फत उहाँले संवेदनशील बिषयमा असंवेदनशील ब्यवहार प्रस्तुत गर्नु भएको छ ।

प्रधानमन्त्री पद देशको संस्कार, संविधान र संवेदनशीलता भन्दा पर ब्यक्तिगत सनकको कैदी बन्न मिल्दैन । संस्थागत जिम्मेवारी भन्दा अलग निर्दलिय आधिपत्य प्रधानमन्त्री पदमा संविधानले परिकल्पना गरेको छैन । अतः प्रधानमन्त्रीको सोच, शैली, अभिव्यक्ति र ब्यवहार सम्पूर्ण रुपले बदल्ने या प्रधानमन्त्रीनै बदल्ने, उहाँकै दल नेकपाको बिषय हो । तर दुई प्रश्न, देशको प्रधानमन्त्रीको अभिव्यक्ति नेपाल सरकारकै संस्थागत अभिव्यक्ति हो कि होइन ? अनि उहाँको दल नेकपा पार्टीको विश्वास बमोजिमको हो होइन ? संस्थागत प्रस्टीकरण अनिवार्यसंग आवश्यक भएको छ ।

प्रतिपक्षी दल नेपाली कांग्रेसका तर्फबाट प्रधानमन्त्रीका पछिल्ला अभिव्यक्ति र ब्यवहारप्रति गम्भीर विमति प्रकट गर्दै यसबारे सरकार र नेकपाको संस्थागत धारणा सार्वजनिक गर्न माग गर्दछु ।

जय नेपाल !

विश्वप्रकाश शर्मा
प्रवक्ता एवं प्रमुख
सूचना, संचार तथा प्रचार विभाग
नेपाली कांग्रेस

सम्बन्धित शिर्षकहरु