
काठमाडाैँ । रसुवागढी राजमार्गको घट्टेखोलामा सवारी साधन आवतजावत बन्द भएको छ।
ठाडोखोलाको भलपानीले पक्की पुलको जग क्षति पुर्याएपछि नेपाल-चीन आवतजावत गर्ने सवारीसाधनलाई घट्टेखोलामा रोक लगाइएको छ। जोखिम न्यूनीकरण गर्न सवारीसाधनमा रोक लगाई प्राविधिकद्वारा अाइतबार अध्ययन सुरु गरिएको प्रमुख जिल्ला अधिकारी कृष्ण पौडेलले बताए।
गत शुक्रबारको वर्षाले घट्टेखोलामा बेजोडसँग पानीको बहाव बढेपछि दक्षिणतर्फको पुलको जग क्षति पुर्याएको स्थानीयवासीले बताएका छन्।
सवारीसाधन नगुडेपछि भन्सार राजश्वमा दैनिक एक करोड घाटा हुन गएको भन्सार कार्यालयले जनाएको छ।
चीन सरकारद्वारा निर्माण गरिएको उक्त पुल क्षतिको स्थानमा सडक विभागका प्रतिनिधिले जगको गहिराइ कति छ चिनियाँ प्राविधिकसँग पनि समन्वय गरी पाँच दिनभित्र गल्छी रसुवागढी राजमार्गको सीधा यातायात सञ्चालन गर्ने लक्ष्य लिएको प्रजिअ पौडेलले बताए।








