भदौ २१, सिरहा। उम्मेदवारको छनोटको विषयमा दुई नेताबीचको विवाद बढ्दै जाँदा नेपाली कांग्रेसको जिल्ला पार्टी कार्यालयमा खुकुरी हानाहान भएको छ।
कांग्रेसको तर्फबाट सिरहा नगरपालिकाको मेयरको टिकट पाएका डा। सुभाषचन्द्र यादव र असन्तुष्ट उपेन्द्र यादव पक्षबीच झडप भएको हो । दुई पक्षबीच भएको झडपमा १० जना घाइते भएका छन् ।
घाइते हुनेमा नेपाली कांग्रेस क्षेत्र नम्बर–३ का क्षेत्रीय सभापति सञ्जय यादव, बुधन यादव, देवनाथ सहनी, राजेश्वर यादव, रामबाबु यादव, अरुण यादव, जगदीश यादवलगायत कार्यकर्ता छन् ।
घाइतेको जिल्ला अस्पताल सिरहामा उपचार भइरहेको छ । झडपस्थल प्रहरीले नियन्त्रणमा लिएको छ ।
कांग्रेसले सिरहा नगरपालिकामा मेयरको टिकट डा। सुभाषचन्द्र यादवलाई दिएको छ । उनी कोषाध्यक्ष सीतादेवी यादवका छोरा हुन् ।
जिल्ला अध्यक्षसमेत रहेका सभासद रामचन्द्र यादवमाथि कुटपिट भएपछि उपेन्द्र समूह प्रतिवादमा उत्रिँदा पार्टी कार्यालय रणभूमिमा परिणत भएको थियो । प्रहरीले रडका साथै खुकुरी पनि बरामद गरेको छ ।








