काठमाडौं, मधेस समस्या समाधान नगरी कुनै हालतमा काठमाडौं नटेक्ने ‘भीष्म प्रतिज्ञा’ गरेका सद्भावना अध्यक्ष राजेन्द्र महतो अन्ततः काठमाडौं ओर्लिएका छन् ।
उनी ‘प्रधानमन्त्रीले समस्या समाधान गर्छु तपार्इं काठमाडौं आउनु होस् भनेर फोन गरेको भन्दै आइतबार काठमाडौं उत्रिएका हुन् । विमानस्थलमा पत्रकारहरूसँग कुराकानी गर्दै आफु यो पटक समस्या समाधान हुने आशा लिएर काठमाडौं आएको बताए ।
उनले भने, ‘प्रधानमन्त्रीले आसा दिलाउनु भएको छ । त्यहि भएर म काठमाडौँ आएको छु । नत्र भने त मधेस जान्थे । समस्या समाधान भएन भने मधेस छँ दै छ ।’
उनले अगाडी भने, ‘आन्दोलनले उठाएका मागहरु पुरा हुनु पर्छ । मुलुकले निकास पाउनु पर्छ । अधिकार नपाएका मधेशी मुश्लिम, दलित, जनजाति सबैले अधिकार पाउनु पर्छ ।’
उपचारको क्रममा भारतीय नेताहरुलाई भेटेका महतोले भने, ‘भारतीय नेताहरुको पनि वार्ता र सहमतिमा समाधान होस् भन्ने चाहना छ, भारतीय नेताहरुले पनि सबैले अधिकार पाउनु पर्नेमा जोड दिएका छन् ।’
महतोले संविधान संशोधन गरेर समस्या समाधान हुनुपर्ने बताए । तर, अझै पनि कसैले उधारोमा मधेशलाई ठग्न खोजे त्यसको परिणाम राम्रो नहुने उनको भनाई छ । ‘ठग्न पाईंदैन । जे–जे दिन्छ सरकारले त्यो सबै नगदमा नै लिने हो । सरकार इमान्दारीका साथ आउनु पर्छ । मधेसमा दुई प्रदेश विना समस्या समाधान हुँदैन ।’
महतो मधेस आन्दोलनको समयमा प्रहरीसंगको झडपमा घाइते भएर दिल्ली उपचार गर्न गएका थिए ।
