नयाँ दिल्ली,भारतको उत्तरपश्चिमी नगरमा बलात्कारका एक आशङ्कितलाई भीडले कारागारबाट बाहिर ल्याई मारेपछि तथा प्रहरीको गोली प्रहारमा अर्का एक व्यक्तिको मृत्यु भएपछि अधिकारीहरूले शुक्रबार कर्फ्यु आदेश जारी गरेका छन् ।
एक महिलालाई अनेकौँपटक बलात्कार गरेको आशङ्कामा फेब्रुअरीको अन्त्यतिर पक्राउ परेका ती आशङ्कितलाई बिहीबार नागाल्यान्ड राज्यको दिमारपुर नगरमा रहेको कारागारबाट भीडले बाहिर ल्याइ कुटपिट गरी, मारी एक घण्टाघरमा बाँधिदिएको थियो ।
भीडमा संलग्न भएको आशङ्का गरिएका एक युवकलाई गोली लागेको र पछि सोही चोटका कारण उनको अस्पतालमा मृत्यु भएको दिमापुरका प्रहरी सुपरिन्टेन्डेन्ट मेरेन जमिरले बताउनुभयो ।
उहाँले प्रहरीले परिस्थिति नियन्त्रणमा ल्याउन प्रयास गरिरहेको बताउनुभयो ।
उन्नाइस वर्षीया एक आदिवासी महिलालाई आक्रमण गरेको आरोप लागेका यी बलात्कारका आशङ्कितलाई फेब्रुअरी २४ मा प्रहरीले पक्राउ गरेपछि त्यहाँ तनाव बढिरहेको बताइएको छ ।
नागाल्यान्डका मुख्यमन्त्री टी.आर. जेलियाङले यी आशङ्कित व्यक्ति बङ्गलादेशका आप्रवासी भएको र निजको हत्या भएपछि त्यहाँ बङ्गलादेशी आप्रवासीले सञ्चालन गरेका व्यापारमाथि पनि आक्रमण भएको बताउनुभयो ।
नागाल्यान्डका आदिवासीले छिमेकी बङ्गलादेशबाट गैरकानुनी रूपमा आएर बसोबास गरिरहेका बङ्गाली भाषा बोल्ने जनसङ्ख्याको वृद्धि भइरहेको र उनीहरूले आफ्नो भूमि तथा स्रोत उपभोग गरिरहेको आरोप वर्षौँदेखि लगाउने गरेका छन् ।
प्रहरी अधिकारी जमिरले परिस्थित निकै तनावपूर्ण रहेको र तर आफूहरूले व्यवस्था पुनःस्थापना गर्न प्रयास गरिहेको जानकारी दिनुभयो ।उहाँले हाल सडकमा दङ्गा नियन्त्रक प्रहरीले गस्ती गरिरहेको जानकारी दिनुभयो ।
आशङ्कित व्यक्तिको हत्याका विषयमा अनुसन्धान भइरहेको मुख्यमन्त्री जेलियाङले बताउनुभयो ।
उहाँले परिस्थितिमा सुधार नभएसम्म कर्फ्यु निरन्तर रहने बताउनुभयो ।
सन् २०१२ को डिसेम्बरमा एक छात्रामाथि भएको बलात्कारका विषयमा तयार भएको वृत्तचित्रको सरकारले प्रसारणमा रोक लगाएपछि विवाद चलिरहेको समयमा यो हिंसा भएको हो । एएफपी
