अन्तर्राष्ट्रिय महिला भलिबलमा भारतलाई उपाधि,नेपाल उपबिजेता

Nepal-Vs-Indiaकाठमाडौ, पहिलो दक्षिण एशियाली आमन्त्रण महिला भलिवल प्रतियोगिताको उपाधि भारतले जित्यो भने घरेलु टोली नेपाल उपबिजेता बन्न सफल भएको छ ।मंगलबार त्रिपुरेश्वरस्थित राष्ट्रिय खेलकुद परिषदको कवर्डहलमा भएकोप्रतियोगिताको अन्तिम खेलमा श्रीलंकाबिरुद्ध रोमाञ्चक जित दर्ता गर्दै नेपाल प्रतियोगिताको दोस्रो स्थानमा रहन सफल भयो ।प्रतियोगिताका चार मध्ये तीन खेल जितेर नौ अंक सहित नेपाल प्रतिोगिताको दोस्रो स्थानमा रहन सफल भयो । नेपाल भारतसंगमात्र पराजित भयो । प्रतियोगिताको अन्तिम खेलमा नेपालले श्रीलंका बिरुद्धको प्रतिस्पर्धात्मक खेलमा तीन दुईको सेटमा जित निकाल्न सफल भयो ।

सुरुवाती दुई सेट आफ्नो पक्षमा पारेको नेपालले त्यसपछिका दुई सेटमा कमजोर प्रदर्शन गर्दै गुमाउन पुग्यो । तर अन्तिम सेटमा उत्कृष्ट पुनरागमन गर्दै नेपालले पहिलो पटक अन्तराष्ट्रिय प्रतियोगितामा श्रीलंकालाई हराउन सफल भयो । पहिलो र दोस्रो सेट क्रमसः २५–२३ र २५–२२ ले नेपालले आफ्नो पक्षमा पारेपनि तेस्रो र चौथो सेटमा श्रीलंका हावी हुदै क्रमसः २५–१९ र २५–१४ रोक्यो । दुई सेटमा उत्कृष्ट प्रदर्शन गरेका नेपाली खेलाडीहरु बाँकी सेटमा भने केहि थकित देखिन्थे । नेपाली खेलाडीमा कम खेल अुनभव देखिएपनि टिम प्रदर्शन भने राम्रो देखिन्थ्यो । अन्तिम तथा निर्णायक सेटमा नेपाली टोलीले उत्कृष्ट पुनरागमन गर्दै १५–१० ले आफ्नो पक्षमा पार्न सफल भयो ।
यसअघि मंगलबारैं सम्पन्न खेलमा भारतले बंगलादेशलाई तीन शून्यको सोझो सेटमा हराउदे उपाधि जितेको थियो । राउन्ड राविन लिग प्रणालीमा खेलाइएको प्रतियोगितामा भारत एकमात्र अविजित टोली रह्यो । अन्तिम खेलमा बंगलादेश बिरुद्ध भारतले २५–१३, २५–०६ र २५–९ को सहज सेटमा जित हात पारेको हो ।
उपाधि बिजेता भारतले नगद दुई हजार डलर पुरस्कार पाएको छ भने उपबिजेता घरेलु टोली नेपालले १ हजार डलर र तेस्रो भएको श्रीलंकाले ५ सय डलर पुरस्कार पाएको छ । प्रतियोगिताको उत्कृष्ट खेलाडी उपाधि बिजेता टोली भारतकी स्पाइकर टिजी राजु घोषित भइन । उनले नगद २५ हजार पुरस्कार पाईन ।

सम्बन्धित शिर्षकहरु