दिल्ली संसारका सबैभन्दा प्रदुषित राजधानी,काठमाडौं सातौं नम्बरमा

काठमाडौं । पछिल्लो केही हप्तादेखि भारत वायु प्रदुषणको चपेटामा परेको छ । अत्याधिक प्रदुषणपछि स्वास्थ्य संकटकाल नै घोषणा गरिएको थियो । दिल्लीको प्रदूषणले पुनः एक पटक एशियाली शहरहरूको हावाको गुणस्तरको चर्चा हुन थालेको छ ।

पछिल्ला केही दशकदेखि चीनको राजधानी बेइजिङ विषाक्त हावाका लागि चर्चित छ तर ‍तथ्याङ्कले भने भारत, पाकिस्तान र बाङ्ग्लादेशको हावाको गुणस्तर चीनको भन्दा नराम्रो रहेको देखाउँछ ।

विश्वका सबैभन्दा प्रदूषित ३० शहर मध्ये २२ भारतमा

आइक्यू नामक युरोपेली संस्थाले गरेको अनुसन्धानका अनुसार विश्वका सबैभन्दा प्रदूषित ३० शहर मध्ये २२ भारतमा पर्ने बीबीसीले उल्लेख गरेको छ । बाँकी आठ सहर पाकिस्तान, बांग्लादेश र चीनमा पर्छ । तर त्यसमा बेइजिङ भने पर्दैन ।

प्रदूषणका हिसाबले बेइजिङ १२२औँ स्थानमा छ। राजधानीहरूकै कुरा गर्ने हो भने पनि सबैभन्दा प्रदूषित शहरहरूमा एशियाली मुलुकहरूका राजधानी पर्छन् ।

देशहरूमा सबैभन्दा अगाडि बाङ्ग्लादेश छ। पाकिस्तान र भारतले त्यसपछिको स्थान ओगटेका छन् ।

यो सूची वार्षिक औसत वायु गुणस्तरमा आधारित छ । यी देशहरूमा प्रदूषण मापन गर्ने फरक आधार र सार्वजनिक गरिएको डेटाको पारदर्शितामा भिन्नता भएका कारण उक्त तथ्याङ्कलाई सङ्केतका रूपमा बुझ्न जरुरी छ ।

यी हुन् संसारका सबैभन्दा प्रदुषित सहर

वर्ल्ड एअर क्वालिटी रिपोर्टका अनुसार दिल्ली पहिलो नम्बरमा रहेको छ भने दोस्रोमा ढाका तस्रोमा काबुल चौथोमा मनामा पाँचौमा उलानबटार छैठौंमा कुवेत सातौंमा काठमाडौं आठौमा बेइजिङ नवौंमा आबुधावी १० औमा जाकर्ता ११औमा काम्पाला १२ मा होनोइ १३ मा इस्लामावाद रहेका छन् ।

शहरी क्षेत्रमा सवारीसाधन, धेरै इन्धन खपत गर्ने पावर प्लान्ट र ठूला उद्योग प्रदूषणका प्रमुख कारण मानिन्छ ।

भारतमा किसानहरूले अन्नबाली भित्र्याएपछि खेतका ठूटा र खोस्टामा आगो लगाउने गरेका छन् । त्यस्तो गतिविधि धेरै जसो शरद् ऋतुमा गरिन्छ।

“भारतमा धेरै प्रदूषण हुनुको प्रमुख कारण किसानहरूले लगाएको आगो नै रहेको जस्तो देखिन्छ,” लन्डन स्कुल अफ इकोनोमीक्सका सहायक प्राध्यापक टमस स्मिथ बताउँछन् ।

“यो कुरा चीनले सल्टाइसकेको छ। चीनमा खेतका ठूटा र खोस्टा जलाउन पूर्णरूपमा बन्द गरिएको छ।” प्रदूषण गम्भीर रूपमा बढेपछि भारतको सर्वोच्च न्यायालयले दिल्ली र आसपासका अन्य दुई राज्यमा आगो लगाउन प्रतिबन्ध लगाएको छ । तर जाडो मौसमका कारण चिसिएको हावा र बाक्लो तुवाँलोले वायुमा रहेका हानिकारक कणलाई अड्काइ राखेको छ ।

प्रत्येक वर्ष नोभेम्बर र डिसेम्बर महिनामा दिल्लीको हावा विषाक्त बन्ने गरेको छ ।

Comments

comments

सम्बन्धित शिर्षकहरु