पत्रकार पुडासैनी आत्महत्या प्रकरणः छानबिन कार्यमा बाधा नपुर्‍याउन सर्वदलीय अपिल

काठमाडौं । चितवनका राजनीतिक दल तथा स्थानीय प्रशासनले पत्रकार शालिकराम पुडासैनीको आत्महत्या प्रकरणको छानबिन कार्यमा असर पुग्ने गतिविधि नगर्न सबैसँग आग्रह गरेका छन्। सो घटनाको छानबिनका क्रममा पक्राउ परेका टेलिभिजन कार्यक्रम प्रस्तोता रवी लामिछानेको समर्थनमा प्रदर्शन भइरहेका बेला जिल्ला प्रशासन कार्यालयमा बसेको सर्वदलीय बैठकले सहयोगका लागि सबैसँग अपिल गरेको हो।

निमित्त प्रमुख जिल्ला अधिकारी जनकराज पन्तको अध्यक्षतामा बसेको सर्वदलीय बैठकले तीन बुँदे निर्णय गरी घटनाको छानबिन कार्यमा बाधा पुग्ने खालका गतिविधि नगर्न आग्रह गरेको छ। बैठकले घटनाको अनुसन्धानका क्रममा रवी लामिछानेसहित तीनजना पक्राउ परी अदालतबाट पाँच दिनको म्याद समेत थप भैसकेको अवस्थामा पक्ष र विपक्षमा नभइ न्याय निरुपण कार्यमा सहयाेग पुर्‍याउन एवं शान्ति कायम गर्न राजनीतिक दलहरुको तर्फबाट आम जनसमूदायमा अपिल गर्ने निर्णय गरेको छ।

यस्तै, जनताको दैनिक जीवनमा असर पुग्ने गरी एवं स्वस्छ, निश्पक्ष न्याय सम्पादनमा खलल पुग्ने गरी हुने प्रदर्शन तथा तोडफोडलाई निरुत्साहित गर्ने निर्णय पनि सर्वदलीय बैठकले गरेकाे छ।

निश्पक्ष छानबिन होस्ः मानवअधिकारवादी

यस्तै, चितवनस्थित विभिन्न मानवअधिकारवादी संघसंगठनहरुले घटनाको निश्पक्ष छानबिन गर्न माग गरेका छन्। विभिन्न ८ वटा मानवअधिकारवादी संस्थाहरुले आइतबार संयुक्त विज्ञप्ति प्रकासित गरी अनुसन्धानमा कुनै पनि दबाब नदिई स्वतन्त्र र निष्पक्ष अनुसन्धानमा सहयोग पुर्याउन अपिल गरेका छन्।

विज्ञप्तिमा उक्त घटनाको सत्य तथ्य पत्ता लगाई कानुनको परिपालना गर्न सरकारसँग आग्रह गरिएको छ भने न्यायीक प्रकृयामा रहेकाे घटनाको समर्थन वा विरोधमा लाग्नु भन्दा कानुनी सर्वोच्चतालाई ख्याल गरी संयमता अपनाउन सबैसँग आग्रह गरिएको छ।

पत्रकार पुडासैनी गत साउन २१ गते चितवनस्थित हाेटल क‌ंगारुमा झुण्डिएकाे अवस्थामा मृत भेटिएका थिए। मृतक पुडासैनीले आफूलाई आत्महत्या गर्न बाध्य पारेकाे भन्दै पत्रकार रवी लामिछानेसहित तीनजनालाई पाेलेकाे भिडियाे सार्वजनिक भएपछि प्रहरीले बिहीबार लामिछानेसहित तीनै जनालाई पक्राउ गरी चितवन लगेकाे छ। त्यस यता पत्रकार लामिछानेकाे समर्थनमा चितवनमा उग्र प्रदर्शन भइरहेकाे छ भने देशका विभिन्न भागमा पनि विराेध प्रदर्शन भएकाे छ।

Comments

comments

सम्बन्धित शिर्षकहरु