पुनर्निर्माणमा गैरआवासीय नेपालीको भूमिका महत्वपूर्ण : प्रधानमन्त्री प्रचण्ड

prachanda-and-shesh-ghaleकाठमाडौं । प्रधानमन्त्री पुष्पकमल दाहाल प्रचण्डले गैरआवासीय नेपाली संघ (एनआरएन) ले गोरखाको लाप्राकमा बनाउन लागेको नमुना वस्ती नेपालको पुनर्निर्माण अभियानका लागि उदाहरणीय हुने बताएका छन् ।
संघका अध्यक्ष शेष घलेसँगको भेटमा प्रधानमन्त्री दाहालले भूकम्पका बेला प्रभावकारी राहत बितरण कार्यबाटै एनआरएनको क्षमता प्रष्ट भएको भन्दै पुनर्निर्माण अभियान पनि त्यस्तै अनुकरणीय हुने विश्वास ब्यक्त गरे ।

सो अवसरमा उनले पुनर्निर्माण अभियानमा आफ्नो पूर्ण समर्थन र सहयोग रहने प्रतिवद्धता व्यक्त गर्दै यस क्रममा देखिएका गतिरोधलाई अन्त्य गरी एनआरएन जस्तो निस्वार्थ भावनाबाट सहयोग गर्न खोज्ने संस्थालाई मद्दत गर्न सरकार तयार रहेको जानकारी गराए ।
अध्यक्ष घलेले संघले लाप्राकमा निर्माण गर्न लागेको नमूना बस्तीको अवधारणा प्रधानमन्त्री समक्ष प्रस्तुत गर्दै यसको कार्यान्वयन त्रिपक्षीय सम्झौता मुताविक गर्न संघ कटिवद्ध रहेको र गुरुयोजना बनाउने काम भई रहेको जानकारी गराए ।
लालपूर्जा हस्तान्तरण गरेपछि पुनर्निर्माण : सीइओ ज्ञवाली
राष्ट्रिय पुनर्निर्माण प्राधिकरणका प्रमुख कार्यकारी अधिकृत (सीईओ) सुशील ज्ञवालीले संघसँग भएको त्रिपक्षीय सम्झौताअनुसार नै लाप्राक पुनर्निर्माण अगाडि बढ्ने जानकारी दिए ।
संघका अध्यक्ष शेष घलेसँगको हालैको भेटमा सीइओ ज्ञवालीले अन्य गैरसरकारी संस्थालाई जस्तै एनआरएनलाई पनि रकम सेवाग्राहीको खातामा जम्मा गर्न लगाउने बिषयमा छलफल भए पनि सम्झौताअनुसार काम गर्न प्राधिकरण तयार रहेको बताए ।

एनआरएनको अगुवाईमा लाप्राकमा ६ सय बढी घर भएको नमुना वस्ती बनाउन भएको सम्झौताअनुसार संघले हाल त्यसको गुरुयोजना निर्माण गरिरहेको छ । हालै जिल्लास्थित अधिकारीले संघलाई सेवाग्राहीको खातामा रकम जम्मा गर्न ताकेता गरेपछि संघले पुनर्निर्माणको पूर्वनिर्धारित ढाँचामा परिवर्तन भएकोबारे प्राधिकरणसँग जवाफ माग गरेको थियो ।
जवाफमा सीइओ ज्ञवालीले गुरुयोजना निर्माण भएपछि सेवाग्राहीको नाममा जग्गाको स्वामित्व दिने कार्य सुरु हुने र त्यसलगत्तै एनआरएनले निर्माण कार्य सुरु गर्न सक्ने जानकारी गराए ।

Comments

comments

सम्बन्धित शिर्षकहरु