क्रिकेट प्रशिक्षक दासानायकेको समयावधि बढ्यो

काठमाडौँ,राष्ट्रिय क्रिकेट टिमका प्रशिक्षक पुबुदु दासानायकेलाई एक वर्षका लागि समयावधि (करार नवीकरण) थप गरिने भएको छ ।

युवा तथा खेलकुद मन्त्रालयले क्रिकेट खेलको विकास र विस्तारको लागि प्रशिक्षक दासानायकेको नवीकरण एक वर्ष थप गरेको हो ।

नेपाल क्रिकेट सङ्घ(क्यान) ले आर्थिक अभाव देखाउँदै प्रशिaक्षक दासानायकेलाई करार अवधि थप नगर्ने भन्दै आएको थियो ।
युवा तथा खेलकुद मन्त्री पुरुषोत्तम पौडेलले प्रशिक्षक दासानायकेको करार अवधि यही असार १७ गते सोमबार समाप्त भएकोमा फेरी एक बर्ष थप गरिएको मंगलबार जानकारी दिनु भयो ।

सन् २०११ अक्टोबरदेखि दासानायकेले नेपाली प्रशिक्षकको भूमिका निर्वाह गर्नुभएको थियो ।

दासानायकेले प्रशिक्षकको भूमिका निर्वाह गरेपछि नेपालले पहिलोपटक ट्वेन्टीट्वेन्टी विश्वकपको यात्रासम्म तय गर्यो भने सोही प्रतियोगितामा हङ्कङ र अफगानिस्तानलाई पराजित गरेको थियो ।

यस्तै, संयुक्त अरब इमिरेट्स (युएई) मा भएको एसिसी एलिट कप क्रिकेट प्रतियोगितामा नेपाल विजेता बनेको थियो भने विश्व क्रिकेट लिग डिभिजन ३ र ४ को उपाधिसमेत हासिल गरेको थियो ।

नेपालले विश्वकप खेलेका आधारमा अन्तर्राष्ट्रिय क्रिकेट परिषद् (आइसिसी)ले यही असार १४ गते शनिबार नेपाललाई ट्वेन्टीट्वेन्टी अन्तर्राष्ट्रियको मान्यता समेत दिएको थियो ।

Comments

comments

सम्बन्धित शिर्षकहरु